Не болды?
2021 жылдың 11 ақпан күні Гүлдана Санақбай Алматы қаласына емделуге жолға шығып, сол бойы хабарсыз кеткен. Жамбыл облысы, Шу ауданының тұрғыны Гүлдана Санақбайдың жоғалып кетуі елді дүрліктіріп, оны іздеуге қыздың туыстары, полицейлер мен еріктілер қосылды. Соңында қыздың мәйітін Шу өзенінің бойынан тапқан. Оның өліміне кінәлі делінген екі күдікті сол сәтте-ақ ұсталған. Күдікті ретінде күйеуі Берік Қалқан мен қылмысқа қатысы бар автокөлік жүргізушісін қамауға алынды.
Сот процесі
Қазіргі таңда Гүлдана Мейірланқызының экс-күйеуі Берік Қалқан мен автокөлікті жүргізген Нұрлан Дарханға қатысты сот процесі өтуде. Сотта Нұрлан Дархан сот алдында жауап берді. ҚР Қылмыстық кодексінің 432 бабымен (Қылмыс туралы хабарламау) толық кінәсін мойындады. Қылмысты жасыру себебін аудандағы «криминалдық авторитет» Берік Қалқаннан қорыққандығын айтты. Ол Қалқанның өзіне «құқық қорғау органдарында мықты таныстары бар екендігін және қылмыс туралы тіс жаратын болсаң отбасынды өлтірем» деп қорқытқанын алға тартқан.
Қазіргі таңда Берік Қалқанға ҚК 99 баптың 1 тармағы (Адам өлтiру) бабы бойынша айып тағылуда. Кінәсі дәлелденсе сегіз жылдан он бес жылға дейiнгi мерзiмге бас бостандығынан айырылады. Алдағы сот отырысында басты айыпталушы сот алдында сұрақтарға жауап береді.
Тергеу мен сот отырыстары туралы Гүлдана Санақбайдың анасы Индира Татиябекқызы өзінің наразылығын жеткізді. Қызынан айырылған ана экс-күйеубаласының ісі ҚК 99 баптың 1 тармағы бойынша дәрежеленуіне қарсы.
Қылмыстық іс амалдарына келіспеймін. Бұрыңғы күйеубалам Қалқан Берік Қалмырзаұлының Қылмыстық кодекстің 99 баптың 1 тармағы бойынша дәрежеленуіне қарсымын. Өйткені, қызымды алдын ала келісіліп, көліктен көлік ауыстырып, адамдарды дайындап, өлтіріп тұрғандығы туралы айғақ бар. Қасындағы бала 434 баппен айыпталып жатыр, оның да 99 баптың 2 тармағымен ісі қаралуын талап етемін. Үшінші адам 434 баппен жауапқа тартылып жатқан жігіт куәгер болып жүр. Прокуратура неге бұлай шешті? Осы сұрақтың қаралуын талап етемін, – дейді Индира Татиябекқызы.
Orda.kz тілшісі алдағы уақытта сот процесіне бақылаушы ретінде қатысып, ақпарат жариялайтын болады.
Исламбек Дастан, Жамбыл облысы
