Стратегиялық жоспарлау және реформалар агенттігі Ұлттық статистика бюросы еліміздегі халық санына қатысты ресми мәліметтерді жария етті.
Бюро мәліметтеріне сүйенсек елімізде халық саны 249 мың адамға артқан. 2021 жылғы 1 маусым күніндегі жағдай бойынша елімізде халық саны 18984,8 мың адамды құрады, оның ішінде қалалықтар – 11237,0 мың (59,2%), ауылдықтар –7747,8 мың адам (40,8%). Бұл 2020 жылғы 1 маусыммен салыстырғанда 249,0 мың адамға көп, яғни халық саны 1,3%-ға өсті. Ал 2021 жылғы қаңтар-мамырда республика халқының табиғи өсімі 2020 жылғы қаңтар-мамырмен салыстырғанда (106,8 мың адам) 4,4% өсіп, 111,5 мың адамды құраған. АХАТ органдары ұсынған азаматтық хал актілері жазбаларындағы мәліметтерді өңдеу нәтижесінде, 2021 жылғы қаңтар-мамырда туылғандар саны 175,2 мың адамды құрағаны анықталып отыр. Бұл 2020 жылғы қаңтар-мамырдағы көрсеткішке (156,8 мың адам) қарағанда 11,7%-ға көп.
Қарастырылып отырған кезеңде қайтыс болғандар 63,7 мың адамды құрады, бұл 2020 жылғы қаңтар-мамырға (50,0 мың адам) қарағанда 27,3% көп. 2021 жылғы қаңтар-мамырда республикада 1 жасқа дейін шетінеген 1423 нәресте тіркелді. 2020 жылғы тиісті кезеңмен салыстырғанда бұл көрсеткіш (1221 шетінеген нәресте) 16,5% артты. Көші-қон қызметі органдары ұсынған мәліметтерді өңдеу нәтижесінде, 2021 жылғы қаңтар-мамырда елімізге тұрғылықты тұруға келгендердің тіркелу саны 3662 адамды, елімізден кеткендердің саны 9862 адамды, көші-қонның айырымы -6200 адамды құрады.
Автор: Жұлдыз Кенжегалиева Тағы да оқыңыздар: https://kaz.nur.kz/society/1922540-elimizde-xalyq-sany-artty-ulttyq-statistika-byurosy-resmi-malimetterdi-zariyalady/
