Ержан қажы Малғажыұлы мүфти болған уақыт аралығында қазақстандық 5 мыңға жуық азамат радикалды райларынан қайтқан.
Бас мүфти болған Ержан қажы Малғажыұлы өзі қызмет атқарған 2013-2017 жылдар аралығында бірқатар жұмыстар атқарылған. Ол 4 жылда атқарылған жұмыстар нәтижесінде жат ағымның арбауында жүрген 940 азамат ханафи мазхабын таңдап, қатарымызға қосылса, 4967 адам радикалды райларынан қайтқан. Сондай-ақ 2014 жылы діни жолымыз бен бағдарымызды айқындайтын, мемлекет тұтастығының нығая түсуіне септігін тигізетін Діни басқарманың 2020 жылға дейінгі даму тұжырымдамасын қабылданды. Бұдан өзге діни қызметтің сапасын арттыруға арналған 4 бағыты бекітілген. Атап айтқанда, көркем уағыз, жат ағымның жетегінде кеткен жастармен жұмыс, қайырымдылық іс-шаралар және халықты діни сауаттандыру.
Сонымен қатар еліміздегі мұсылман қауымын бірлікке үндеп, өзге дін өкілдерімен бейбіт өмір сүруге шақыратын ҚМДБ-ның Тұғырнамасы да бекітілген. Мазхаб пен наным-сенімде жікке бөлінбеуге шақыратын ол құжат өз жемісін беруде. Аталмыш Тұғырнама — Қазақстан Республикасы Конституциясының сенім бостандығы туралы ұстанымына, Қазақстан Республикасының «Діни қызмет және діни бірлестіктер туралы» Заңына, еліміздің 2050 жылға дейінгі Стратегиялық даму жоспарына, ҚМДБ-ның Жарғысына негізделіп әзірленген стратегиялық құжат болып табылады. Сондай-ақ мешіттегі жамағаттың ауызбіршілігін арттырып, бірегей құлшылық жасау тәртібін орнату мақсатында ҚМДБ мешіттерінің Ережесі қабылданды. 2015 жылы ақпанда елімізде тұңғыш рет «Ислам — бейбітшілік пен келісім діні» тақырыбында І республикалық имамдар форумы өтті. Шара аясында «Қазақстан мұсылмандары діни басқармасының тұғырнамасы», «Дін қызметкерінің этикасы», «Имамның тұлғалық келбеті», «Мұсылман келбеті» атты маңызды құжаттар қабылданды.
Тағы бір айта кететін жайт, ҚМДБ жанындағы Ғұламалар кеңесінің жаңа құрамы жасақталды. Бүгінде ол кеңесте 17 ғалым жұмыс істеуде. Оның 9-ы ғылым докторы, қалғаны магистрлер. Діни басқарма қызметі аясында 2014-2015 жылды «Дін мен дәстүр» жылы деп жарияланған болатын. ҚМДБ жанынан діни білімі терең, тәжірибесі мол білікті дін ғалымдарының басын біріктірген ақпараттық насихат топтары құрылған. Олар халық арасында түсіндіру жұмыстарын жүргізіп келеді. Жат ағымға кеткен жастар дәстүрлі ханафи мазһабын таңдап, ортаға оралуда. Бұл қуанарлық жағдай. Биылғы жылы атқарылған жұмыстар нәтижесінде жат ағымның арбауында жүрген 940 азамат ханафи мазхабын таңдап, қатарға қосылыпты. Жалпы Ержан қажы Малғажыұлы бас мүфти болып тұрған 2013-2017 жылдар аралығында жалпы саны 4967 адам радикалды райынан қайтқан. Бұдан Қазақстан мұсылмандары діни басқармасының кеңсесі 2014 жылы Алматыдан Астана қаласына көшірілді.
Осы тұста айта кететін жайт, ағымдағы жылдың 8 желтоқсан күні Алматы қаласында өткен Қазақстан мұсылмандарының VIII құрылтайы барысында Қазақстанның 2018-2022 жылдар кезеңі аралығындағы бас мүфтиі болып Серікбай қажы Оразұлы сайланды.
TURANINFO.KZ
