Коронавирус дерті әлемді алаңдатып, үрейлендіріп тұр. Бір сәтте, бір кезеңде әлемді жаулаған бұл дерттің алаңдататындай жөні бар. Адамзат баласы, өмір үшін күресіп жатқандай. Ал олардың өмірін аман сақтап қалу үшін жанталасып жүргендер ше? Нағыз жанкештілер солар емес пе? Осындай қиын кезеңде жауапкершілік жүгі дәрігерлердің иығына түсіп тұрғандай. Олар нағыз оқ пен оттың ортасында жүрген жауынгерлер іспеттес. Саптай тізіліп, күні-түні ұйқы көрмей, адам баласының денсаулығын күзеткен тыныштық күзетшісі секілді. Оларға қымбаты — адамның амандығы.
Тараз қалалық көпбейінді ауруханасының жұқпалы аурулар құрылымы қаңтар айынан бастап жұмыс істейді. Рысбек батыр көшесінде орналасқан инфекциялық стационар — 240 төсекке арналған.
«Қазіргі таңда Жамбыл облысында тіркелген жағдайларға байланысты медицина қызметкерлері күшейтілген жұмыс режиміне көшті. Жұқпалы аурулар бөліміне жатқызылып, тиісті ем шараларын алған азаматтардың ішінен шығып жатқаны дер кезінде қабылданған шаралар мен тынымсыз атқарылған жұмыстардың, яғни дәрігерлер мен мейірбикелердің отбасы, бала-шағасын тастап, күндіз-түні дамыл таппай еңбек еткеннің нәтижесі деп айтуға толық негіз бар. Мен аурухананың меңгерушісі ретінде науқастардың жағдайының күрт төмендеп кетпеуіне, олардың дертінен айығып үйлеріне аман-есен оралулары үшін сәт сайын пациенттердің жағдайын бақылап, өзіме жүктелген міндетті абыроймен атқаруға тиіспін. Көңілге медеу болары, дертіне шипа тапқан науқастарымыз алғысын жаудыруда. Соның бірі – 80- ге келген әжей. «Осыдан екі апта ауыр жағдайда бізге келіп түсті. Оның өкпесі қабынып, екі жақты пневмония болған. Сол әжені кеше үйіне шығарып салдық. Бәрімізге ақ батасын берді. Алла қабыл етсін! Жұртымыз тыныш, еліміз аман болсын! Қазір ауруханамыз қажетті барлық дәрі- дәрмекпен, құрал жабдықпен қамтамасыз етілген, – дейді Ербол Ордабеков.
Қаңтар айынан бастап ннфекциялық стационардан 2 800-ден аса адам жазылып шыққан. Бүгінгі күннің ақпараты бойынша 184 адам ем қабылдауда.
Денсаулық сақтау басқармасының баспасөз қызметі
