Жамбыл облысы әкімдігінің тілдерді дамыту басқармасының тарапынан «QazONLINE» айдарымен қазақ тілін тез үйренуге бағытталған 40 сабақ, ағылшын тілін онлайн үйрену бойынша 50 сабақ әлеуметтік желілерге жарияланды. Сонымен қатар, қазақ тілін базалық деңгейде үйретуге бағытталған 30 сабақ әзірленіп, әлеуметтік желілердегі парақшаларға орналастырылуда. Бүгінгі күні Жамбыл облысы бойынша Тіл саясатын іске асырудың 2020-2025 жылдарға арналған мемлекеттік бағдарламасын іске асыру жөніндегі іс-шаралар жоспары облыс әкімінің 2020 жылғы 6 сәуірдегі №71 қаулысымен бекітілген. Мемлекеттік бағдарламадағы 3 бағыты бойынша облысқа қатысты 3 нысаналы индикатор мен 5 нәтижелі көрсеткішке қол жеткізу көзделген.
Белгіленген нысаналы индикатор мен нәтижелі көрсеткіш жыл соңындағы әлеуметтік зерттеу қорытындысы бойынша анықталады. Облыста тіл саясатын жүзеге асыру бағытында басқарма тарапынан жүйелі жұмыстар жүргізілуде. Мемлекеттік тілді пайдалануға және үйренуге бағытталған 1 ақпараттық және 1 әлеуметтік бейнеролик әзірленіп, жергілікті телеарналардан көрсетіліп, қазіргі таңда әлеуметтік желілерде таратылуда. Мемлекеттік тілдің этносаралық қатынас тілі ретіндегі рөлін күшейту мақсатында ағымдағы жылы мемлекеттік тілді оқу курстарының санын арттырудың жол картасы әзірленіп, мемлекеттік тілді үйренушілер санын 4000 адамға жеткізу жоспарлануда.
Тілдік орта қалыптастыру мақсатында аудандар мен Тараз қаласында ашық аспан аясында TedХ әдісіменұйымдастырылатын «SŐİLE» клубының 42 отырысы өтіп, 582 тіл үйренуші қатысты. Өзге этнос өкілдеріне қазақ тілін еркін меңгерту мақсатында ашылған «SŐİLE» клубының отырыстары апта сайын өтуде. «Сауаттылық Time» жобасы бойынша қазақ тіліндегі терминдер мен сөз тіркестерінің, көне, ескі кітаби сөздердің дұрыс жазылу емлесін көрсету, бойынша 106 сөз жарияланды. «Мемлекеттік тіл – ұлттық құндылық» тақырыбында жастарға қоғамдық лекция, облыстық өңірлік коммуникация қызметінің аланыңда брифинг өткізілді.
Облыс әкімдігінің тілдерді дамыту басқармасының тапсырысымен орыстілді азаматтар мен өзге ұлт өкілдері үшін мемлекеттік тілді үйретудің ең қарапайым тәсілі арқылы қазақ тілі мен емле ережелерін үйретуге бағытталған «Қазақша үйренейік!» телебағдарламасы эфирге шықты. Телебағдарлама «JAMBYL» телеарнасынан аптасына 1 рет көрсетіледі.
Материал Жамбыл облысы әкімдігінің ішкі саясат басқармасының тапсырысы бойынша дайындалды
