Қазақстандық теннистің жарық жұлдызы, әлемдік рейтингте 31-сатыға дейін көтерілген Зарина Дияс 32 жасында кәсіби мансабын аяқтайтынын ресми түрде жариялады. Әлеуметтік желідегі парақшасында жанкүйерлеріне, отбасына және бапкерлер ұжымына алғыс айтқан спортшы отандық теннис тарихында айтулы із қалдырды.
Оның кәсіби жолы 2000-жылдардың соңында, небәрі 15 жасында Прага корттарында басталған еді. Сол кездің өзінде болашақ жұлдыз Петра Квитова секілді мықтыларды қапы қалдырып, ширек финалға дейін жеткен Зарина әлемдік қауымдастықтың назарын бірден өзіне аударды. 2009–2010 жылдары ITF турнирлерінде алғашқы жүлделерін иеленген ол, 2014 жылы мансабындағы нағыз серпілісті жасады. Сол маусымда ол Australian Open турнирінің үшінші айналымына шығып, Уимблдонның 1/8 финалына дейін жетті. Бұл жетістігін ол келесі жылы да қайталап, «Үлкен дулыға» жарыстарында тұрақты ойын өрнегін көрсетті.
Заринаның мансабындағы ең жарқын жеңіс 2017 жылы Жапонияда (Japan Women’s Open) тіркелді. Іріктеу кезеңінен бастап, финалда Мию Катоны ұтқан Дияс өзінің алғашқы WTA титулын иеленді. Жекелей сында әлемнің 31-ракеткасы, жұптық сында 89-сатыға дейін көтерілген спортшы корттағы байсалдылығымен және қайсар мінезімен жанкүйерлер есінде қалмақ.
