Бүкіл әлемдік бокс сериясындағы «Astana Arlans» пен ресейлік «Patriot Boxing Team» командалары жұдырық түйістірді. Алғаш рет Әулие-Ата жерінде өткен кәсіпқой бокс кешінде арландар ресейлік команданы 4:1 есебімен ойсырата жеңді. Айта кетерлігі, бұл екі команда маусымның алғашқы айналымында кездескен болатын. Ресейде өткен ол ойында да астаналықтар 3:2 есебімен жеңіске жеткен еді. Сол кеткен есені қайтарамыз деп келген солтүстік көршілеріміздің бұл жолыда дегендері бола қоймады.
Қош, сонымен шаршы алаңға 52 келі салмақ дәрежесіндегі арлан, команда капитаны Олжас Сәттібаев пен Вячеслав Ташкараков көтерілді. Туған қаласында өтіп жатқан кездесу Олжасқа оңайға соқпады. Себебі, оған екі есе жауапкершілік артылды деуге болады. Өйткені, команда капитаны ретінде жеңісті жолды бастау мақсаты қойылса, содан соң тілеулес жерлестерінің алдында бар шеберлігін көрсету межесі тұрды. Ол бұл сенімді ақтады да. Кездесудің 3-ші раундында қарсыласына ауыр соққысы дарып, жарақат салды. Дәрігерлердің көмегіне жүгінген Ташкараковтың кездесуді бұдан әрі жалғастыруға мүмкіндігі жоқтығы белгілі болды. Орын алған бұл жағдайға дейін команда капитаны есепте алда тұрған болатын. Сондықтан жеңіс Олжасқа бұйырды.
Мұнан соң рингке көтерілген 60 келіде Закир Сафиуллин мен Артур Субxанкуловтың кездесуі де өте тартысты өтті. Кездесу бастала салысымен шарша алаң қожайыны кім екенін білдірген Закир қарсыласына айтарлықтай мүмкіндік бере қоймады. Бұл жағдай 5 раундқа дейін жалғасты. Тек соңғы 3 минуттықта Закир Артурдың бірді-екілі ауыр соққыларын бойына дарытып көрді. Дегенмен, кездесу аяқталар тұста есесін қайтарып алды. Төрешілер бұл кездесуді бірауыздан Закирдің пайдасына 3:0 есебімен шешті.
69 келіде тағы бір жерлесіміз Асланбек Шымбергенов Шаxабас Маxмудовпен күш сынасты. Командасы 0:2 есебімен жеңіліп жатқаннан кейін Шаxабас Асланбекті ашық айқасқа шақырып, шамасы келгенше жұдырықтасып бақты. Дегенмен, Бүкіл Әлемдік бокс сериясында шыңдалып қалған Шымбергенов оған дес бере қоймады. Сөйтіп, бұл салмақ дәрежесінде де жеңіс астаналықтардың пайдасына 3:0 есебімен шешілді.
81 келіде Арман Рысбек пен Павел Силягин арасындағы жекпе-жек өте тартысты өтті. Салмақ ауырлаған сайын соққылардың жойқындығы арта түсетіні белгілі. Бұл жұп жеңіс үшін қарсыласын да, өздерін де еш аяп қалмады. Бір-біріне барынша ауыр соққа дарытуға тырысып, кездесуді уақытынан бұрын аяқтауға талпынды. Бірақ, бұл сында Арманның бір бас жоғары екендігі анық көрініп тұрды. Қорытынды есеп 2:1 арлан Арманның пайдасына.
Қос команда арасындағы соңғы жекпе-жек аса ауыр салмақта Олжас Бугаев пен Магомед Омаров арасында өтті. Айта кетерлігі, бұл Олжастың дебюдтік кездесуі болатын. Кездесуде оның жеңіске деген құштарлығы көп болғанымен тәжірибесінің жоқтығы қол байлау болды. Сондай-ақ қарсыласы да өзінен бойы ұзын болды. Бұл өз кезегінде Магомедтің еркін қимылдап, кездесуді өз пайдасына шешуге сеп болды. Есеп 0:3.
Ал қос команда арасындағы қорытынды есеп 4:1 «Astana Arlans» командасының пайдасына.
TURANINFO.KZ
