Алқалы жиынға «Қоғамдық келісім» КММ басшысы Мүбарак ЖИНАҚБАЕВА, Жамбыл облыстық Ақсақалдар кеңесінің мүшелері, аудандық Ақсақалдар кеңесінің төрағалары мен өкілдері қатысты.
Жиынды Жамбыл облыстық ҚХА төрағасының қоғамдық орынбасары, Ақсақалдар кеңесінің төрағасы Асқарбек СЕЙІЛХАНОВ жүргізіп, күн тәртібіндегі негізгі екі мәселені ортаға салды.
Наурыз айында Атырау қаласында Ұлттық құрылтайдың үшінші отырысы өткен болатын. Күн тәртібіндегі кезекті мәселе Ұлттық құрылтайдағы өзекті тақырыптар төңірегінде өрбіді. Кеңес төрағасы Асқарбек Ақылшаұлы Мемлекет басшысы Қасым-Жомарт ТОҚАЕВТЫҢ «Адал адам – Адал еңбек – Адал табыс» атты мәселесіне кеңінен тоқталды.
— Қай заманда болсын адам адал еңбегімен көрікті, адалдығымен ардақты. Жаңа құндылықтар бастауына ең алдымен адал азаматтарды қойып, адал еңбек етуге шақыруымыз керек. Ертеңгі болашаққа зиялы қауым өкілдері үлгі болуымыз қажет, — деді Асқарбек Ақылшаұлы.
Жиында Тараз қаласының өзбек этномәдени бірлестігінің басшысы, кеңестің төраға орынбасары Абдурахман ЗАЙНУТДИНОВ, Тараз қалалық ардагерлер кеңесі төрағасының орынбасары Малтабар ЖАМАНБАЕВ жастар арасындағы белең алып келе жатқан өзге де мәселелерді ортаға салып, шешу жолын қарастырды.
Кеңес отырысының соңында мекеме басшысы Мүбарак Жинақбаеваның Ұлттық құрылтай тәуелсіз еліміздің болашағы мен дамуы, татулығы мен бірлігі жолында жоғары маңызға ие екенін атап өтті.
Айжан АУЕЛБЕКОВА
Мақала Жамбыл облысы әкімдігі ішкі саясат басқармасының ақпараттық саясаты тапсырысы негізінде жарияланды
