Бала, бала, деп, түнде шошып оянған, түн ұйқысын төрт бөліп, бесігін таянған анасының мейірім жылуын сезіп, асқар таудай әкесінің қамқорлығын көріп өскен баладан бақытты бала жоқ, сірә.
Алайда, өкінішке орай бүгінгі күндегі аумалы-төкпелі заманда отбасылық құндылықтар түгіл, ар-ұят, намыс, ождан секілді қазақ халқы жаннан қымбат санаған қасиеттерді жоғалтып жатқанымыз ащы шындық. Соның салдарынан бүгінгі қоғамда ажырасу мәселесі қазіргі уақыттың асқынған дертіне айналды.
Тарихта, ата-бабаларымыз отбасы құндылықтарын жоғары ұстанған, алайда заман өзгергенімен кейбір жас отабасыларда бұл көзқарас бірінші орында екенін сезіну қиын деп айтсақ болады.
Ажырасудың салдарынан қабырғасы қатпаған балалар қайтпек? Олардың күні не болмақ? Анасымен қалса, өзге әкенің, әкесімен қалса, өзге шешенің өгейлігін көріп, көңілі күпті болмай ма? Ондай күн басына тумасына еш кепіл жоқ. Ажырасудың ең ауыр зардабы да осы.
Толық отбасыда және толық емес отбасыда өскен баланың психологиялық мінездік айырмашылығы аспан мен жердей болады. Бала әкесіне қарап өседі және содан тәрбие алады, бұл ұғым ата-бабларымыздан қалған өсиет.
Сотқа ажырасуға талап қою арыздарын бергендер, судья тарапынан жанұяны сақтау мақсатында талап қоюшымен, жауапкермен әңгімелесу жүргізеді, содан татуласу үшін жақтарға бір айдан алты айға дейін уақыт береді, сонымен қатар, судья жанұяны сақтау мақсатында, Жамбыл ауданының «Бастау» жұмыс тобына және Жамбыл аудандық Билер Кеңесіне, ресурстік көмек көрсету үшін жақтарды жібереді. Билер Кеңесі ерлі-зайыптылардың екеуімен де сөйлесіп бітімгершілікке келтіруге бар күшін салады. Бұл тұрғыда Билер сотқа дейін де ерлі-зайыптыларға ақыл-кеңес беріп көмек бере алады, тек отбасының бір жағынан өтініш түссе болды.
Жанұя — шағын мемлекет. Оның ұйытқысы бір адам болғаны абзал, қалғаны отағасына ұйып, сеніп, ере білуі керек. Ортада бала болса, ажырасу оның психикасына ауыр соққы екендігін, оның ауыр зардабы болуы мүмкіндігін естен шығармаған дұрыс. Қала берді, өзіне, ата-ана мен ағайын туысқа да бұл әрекет абырой әкелмейтінін ойлау керек. Бұл қадамға бармас бұрын, басқа жол жоқ екендігіне әбден көз жеткізіп, үлкендердің ақылын алу аса маңызды. Себебі, қабылдағалы тұрған шешімнің артында адам тағдыры тұр!
Жамбыл аудандық сотының судьясы Д.С.Қыдыралиева
