Жамбыл облысы әкімдігінің ішкі саясат басқармасы «Өңірлік коммуникациялар қызметінің» алаңында ҚР Мемлекеттік қызмет істері және сыбайлас жемқорлыққа қарсы іс-қимыл агенттігің Жамбыл облысы бойынша департаментінің мемлекеттік қызмет басқармасының басшысы Жандос Тойшыбеков, Жамбыл облысы бойынша полиция департаменті Жамбыл облысы бойынша полиция департаменті әкімшілік полиция басқармасының емтихан тіркеу жұмысы бөлімінің бөлім бастығының орынбасары Еркін Халматов, «Азаматтарға арналған үкімет «Мемлекеттік корпорациясы» коммерциялық емес акционерлік қоғамының Жамбыл облысы бойынша филиалының Халыққа қызмет көрсету бойынша Мамандандырылған бөлімі басшысының орынбасары Нұрдаулет Темірбековтың қатысуымен баспасөз конференциясы өтті. Спикерлер «Мамандандырылған ХҚКО — да заңсыз көмекшілерді анықтау мақсатында жүргізілген жұмыстың нәтижесі» туралы баяндап, журналистердің сұрақтарына жауап берді.
Елбасының жыл сайынғы Қазақстан халқына арнаған Жолдауларында мемлекеттік қызмет көрсетудің сапасын арттыру арқылы мемлекеттік органдардың қызметіне деген ел сенімін көтеру маңыздылығы ерекше атап көрсетілуде. Қазақстан Республикасының азаматтары дүниеге келген кезден бастап барлық өмір сүру кезеңінде, барлық салада мемлекеттік қызмет көрсету бойынша мемлекетпен тығыз байланыста болатыны белгілі. Сондықтан да, мемлекеттік қызмет көрсетудің қол жетімділігін қамтамасыз ету және сапасын арттыру мемлекеттік саясаттың басым бағыттарының бір болып табылады. Осыған орай, Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Жамбыл облысы бойынша департаментімен (бұдан әрі – Департамент) мемлекеттік органдар көрсететін қызметтің сапасын арттыруға және аталған саланың дамуына бағытталған «Жасырын тұтынушы» жобасы аясында қоғамдық бақылау жұмыстар жүргізілуде. Жобаның негізгі мақсаты мемлекеттік көрсетілетін қызметтер туралы заңнама талаптарының сақталуына және азаматтарға сапалы қызмет көрсетілуіне қажетті жағдай жасай отырып қоғамды сыбайлас жемқорлыққа қарсы іс-қимылға тарту, сондай-ақ, мемлекеттік қызметтерді көрсету кезінде әкімшілік кедергілерді анықтау болып табылады.
2018 жылы облысымыздың қоғамдық белсенділерімен жоба аясында мемлекеттік қызмет көрсететін 76 мекемелерде «Жасырын тұтынушы» әдісімен зерделеу жұмыстары жүргізілген болатын. Зерделеу барысында мемлекеттік қызметтер көрсететін 26 мекемеде заң талаптары толық орындалмай, кемшіліктерге жол берілетіні анықталды. Аталған мекемелерде барлығы 82 заңбұзушылықтар анықталып, тиісті мекемелерге кемшіліктерді жою бойынша ұсынымдар жолданды.
Сонымен қатар, 2018 жылы делдалдарды анықтау мақсатында мамандандырылған халыққа қызмет көрсету орталығы бөлімінде аталған әдіспен зерделеу жүргізілді. Іс-шара барысында аталған мекеме аумағында азаматтарға жүргізуші куәлігін ешқандай құжаттарсыз 50-60 мың теңгеге алып береміз деп ашық түрде жарнамалап жүрген делдалдардың бар екені анықталды. Осының негізінде облысымыздың Полиция департаменті мен Мемлекеттік корпорацияға тиісті ұсынымдар жолданды. Сонымен бірге, бұл мәселе 28.08.2018 ж. облыстық Қоғамдық кеңесі отырысында қаралып, аталған делдалдар әкімшілік жауапкершілікке тартылды. Ағымдағы жылы осыған ұқсас 2 факті анықталды. «Жасырын тұтынушы» әдісімен түсірілген бейне материал Полиция департаментіне тиісті шаралар қолдану үшін жолданды.
Мемлекеттік көрсетілетін қызметтер екінші деңгейдегі банктерде қол жетімді.
Өткен жылы «Қазақстан Республикасының кейбір заңнамалық актілеріне кәсіпкерлік қызметті реттеуді жетілдіру мәселелері бойынша өзгерістер мен толықтырулар енгізу туралы» Қазақстан Республикасының Заңы қабылданып, жылжымайтын мүлікке құқықтарды мемлекеттік тіркеу функциясы әділет органдарынан «Азаматтарға арналған үкімет» мемлекеттік корпорациясына берілді. Тіркеуші органдарға берілген құзыреттіліктер аясында тараптардың мәмілелерін тексеру және куәландыруды жүзеге асыру тәжірибесін іс жүзінде жүзеге асыру мақсатында Департаменттің ұсынуымен мемлекеттік корпорацияның қызметкерлері «Қазақстанның тұрғын үй құрылыс жинақ банкі» АҚ-ның Тараз қаласы филиалында орналасты. Аталған жұмыстар қызмет алушылардың ипотекалық несиелерден туындайтын жылжымайтын мүлік саласындағы мемлекеттік қызметтерді, сондай-ақ тізілімге сәйкес басқа да мемлекеттік қызметтерді алуға, қызмет алушылардың, соның ішінде банк клиенттерінің қажеттіліктерін едәуір қанағаттандыруға және олардың уақыттарын үнемдеуге мүмкіндік береді.
Мемлекеттік көрсетілетін қызметтерді электронды түрде алу үлесін көбейту бағытында атқарылған жұмыстар.
Мемлекеттік көрсетілетін қызметтерді электронды түрде mGov қосымшасы, Телеграм бот арқылы алуды танымал ету мақсатында Департамент Мемлекеттік корпорациямен бірлесіп, Тараз қаласындағы ірі сауда орындарындағы («Ауыл береке, «Орталық базар», «Метроном», «Дамдес» т.б) тұтынушылар мен саудагерлердің (590 адам) ұялы телефондарына аталған қосымшаларды жүктеп беруде. Іс-шаралар барысында мемлекеттік қызметтерді алу тәртібін іс-жүзінде көрсетіп, «Цифрлы агент» қосымшасы арқылы мемлекеттік қызмет көрсету сапасына баға беру мәселесі үйретілуде. Айта кететін мәселе, «Цифрлы агент» қосымшасы өткен жылдың қараша айында іске қосылған болатын. Бүгінгі таңда мобильді қосымша арқылы 600-ге (595) жуық азаматтар мемлекеттік қызметтерді көрсету сапасын бағаласа, оның ішінде 12 азамат қызмет көрсету сапасына қанағаттанбаған. Аталған шағымдар бойынша тиісті жұмыстар жүргізілді.
