Президент Нұрсұлтан Назарбаевтың «Болашаққа бағдар: рухани жаңғыру» бағдарламалық мақаласы аясында, тәуелсіз Қазақстанның көркеюіне қосқан үлесті көрсету мақсатында өз жұмысын бастаған «Жүз жаңа есім» жобасы қорытындыланды. Ел дамуына зор үлес қосқан азаматтардың өздері мен олардың табысқа жету тарихына мән беріп, оларға ақпараттық қолдау жасап, танымал етудің жаңа мультимедиялық алаңын қалыптастыру үшін 100esim.el.kz сайтында әр облыстан таңдалған азаматтарға дауыс беру жүргізілген болатын.
Арнайы құрылған жұмыс тобы мен сарапшылардың, желі қолданушыларының сайт арқылы берген дауысы нәтижесінде 102 есімнің республикалық тізіміне Алматы қаласынан 19 адам адам енді. Бұл тізім бойынша ең жоғарғы көрсеткіш болып табылады. Осы көрсеткіш арқылы Алматы қаласы өзінің ірі орталық әрі мегополис қала екендігін тағы да дәлелдеп тұр. Мұнда түрлі саланың мамандары үлкен алаңда өз-өзін ел мүддесі жолында еркін көрсете алады. Екінші орынға Шығыс Қазақстан облысы жайғасты. Байтақ Отанымыздың рухани дүниесі аса бай саналатын аумақтан 11 азаматтың есімі тізімге еніп отыр. Абай мен Мұхтар туған өлкенің мұндай көрсеткішке жетуі заңдылық та шығар. Одан кейінгі үшінші орынға қатарынан 4 аймақ енді. Олар: Жамбыл, Солтүстік Қазақстан, Ақмола облыстары мен ел жүрегі Астана қаласы. Тізімге бұл аймақтардың әрқайсынан 8 адам қосылды. Одан кейін тізімде 6 адамдық көрсеткішпен Қарағанды облысы,5 адамдық көрсеткішпен Оңтүстік Қазақстан, Павлодар облыстары және Алматы қаласынан елеулі тұлғалардың есімдері бар. Сыр елі Қызылордадан 4 адам, Қостанай, Батыс Қазақстан облыстарынан 3 адам, жайсаң Жайықтың жағасы Атырау облысынан бар жоғы 2 адам тізімге енген.
Күллі қазақ даласының әр аумағынан жинақталған тізімнің көрсеткіші осындай. Қай аймақтан қанша адам тізімге енсе де, олардың ел үшін, тәуелсіздік жылдары тарих беттеріне жазылған есімдерінің өзі келер ұрпаққа зор өнеге. Бұл ретте осы уақыт ішінде Елбасының «Болашаққа бағдар:рухани жаңғыру» бағдарламалық мақаласында көрсетілген «100 жаңа есім» жобасы барлық үдеден шыға білді. Тізімді жоғарыда көрсетілген сайттан көре аласыздар. Заманауи Қазақстанның бүгінгі келбетін танытатын тізіммен таныса отырып, бүгінгі күннің ел үшін туған ерен тұлғаларының есімін жадымызда сақтап, ұлықтау – салиқалы ұрпақтың зор парызы болмақ.
Фото abctv.kz сайтынан алынды.
TURANINFO.KZ
