Онлайн форматта өткен халыққа есеп беру кездесуінде Жамбыл облысының әкімі Бердібек Сапарбаев өткен жылы агроөнеркәсіптік кешенді дамытудың нәтижелері мен алдағы кезеңге арналған міндеттер туралы айтып берді.
Былтыр ауыл шаруашылығы дақылдарының егіс алқабы 735 мың гектарға жетті, бұл 2019 жылмен салыстырғанда 48 мың гектарға артық. Оның 179,8 мың гектары суармалы жер.
Жалпы, 359,3 мың гектардан 817 мың тонна астық бастырылған десек, орташа өнімділік гектарына 22,7 центнерді құрады.
— Ауыл шаруашылығы аймақ экономикасының негізгі саласы болып қала бермек. Осы орайда біздің марқая айтатынымыз, ол – Жамбыл облысы республикада пияз өндірісі бойынша көшбасшы болып табылатындығы. Өткен жылы 691 мың тонна пияз жиналды, бұл елдегі жалпы өндіріс көлемінің 75
пайызын құрайды, — деді облыс әкімі.
Сонымен қатар, 41 мың тоннадан астам пияз алыс-жақын шетелдерге, атап айтқанда Ресей, Ирак, Австралия, Сербия, Түркия, Пәкістан, Польша және ТМД елдеріне экспортталды.
Егіс алқаптарын әртараптандыру мақсатында түрік компаниясының қатысуымен таңқурай мен құлпынайды
өндірістік отырғызу жүргізілді. Жамбылдық диқандар алғаш рет 835 гектар жерге қыстық рапс екті.
Сонымен қатар, пайдаланусыз жатқан 81,3 мың гектар ауыл шаруашылығы жерлері мемлекет меншігіне қайтарылды.
«Жұмыспен қамтудың жол картасы» аясында он су қоймасы жөндеуден өтті.
— Ауыл тұрғындарының тұрмыстық табысын жақсартудың пилоттық жобасын жүзеге асырудың оң әсерін атап өткен жөн. Жобаның бес бағыты бойынша 9,2 миллиард теңге игерілді. Пилоттық жобаға қатысушы ауылдарда 600-ге жуық жаңа жұмыс орны құрылып, жұмыссыздар саны 1129-дан 589 адамға дейін, яғни, екі есеге қысқарды. Өзін-өзі жұмыспен қамтыған және жұмыссыздар қатарындағы 2,2 мыңнан астам ауылдық өз кәсібін бастады. Нәтижесінде ауыл тұрғындарының табысы 2,5 есе өсті. Пилоттық жобаның қайтарымды қаражатын пайдалана отырып, биыл сүт және ет өңдеу кәсіпорындарының жүктемесін 20-30 пайызға арттыру міндетін қойып отырмыз, — деп атап өтті облыс әкімі.
Жамбыл облысы әкімінің баспасөз қызметі