Бүгін жергілікті коммуникациялар қызметінде ҚР Мемлекеттік қызмет істері жөніндегі агенттігінің Жамбыл облысы бойынша департаментінің басшысы Мақсұт Нәлібаев, Сыбайлас жемқорлыққа қарсы іс-қимыл Ұлттық бюросының Жамбыл облысы бойынша Департаменті басшысы Мұрат Қарымсақов және ҚР Президенті жанындағы Мемлекеттік басқару академиясының Жамбыл облысы бойынша филиалы директорының міндетін аиқарушы Лесбек Егембердиев бұқаралық ақпарат құралдарының өкілдеріне мемлекеттік қызметтің жаңа моделін жүзеге асырудағы ағымдағы жылғы бірінші тоқсан жұмыстарының қорытындылары бойынша брифинг өткізді.
«100 нақты қадам» Ұлттық Жоспарын жүзеге асыру мақсатында мемлекеттік аппараттың тиімділігін арттыруға бағытталған «Мемлекеттік қызмет туралы» Заңын іске асыруда Департамент тарапынан бірқатар жұмыстар атқарылды.
Брифинг барысында Мақсұт Нәлібаев БАҚ өкілдеріне Департаменттің мемлекеттік қызмет саласында, сыбайлас жемқорлық профилактикасы, мемлекеттік қызметшілердің жаңа Әдеп кодексі талаптарын сақтау және мемлекеттік қызмет көрсету салаларындағы жұмысы туралы айтты.
Департамент басшысы брифинг барысында атап өткен маңызды мәселелердің бірі, Департаментпен жүзеге асырылып жатқан «Азаматтық бақылау картасы мен «Адал жол – Честный путь» жобалары турасында болды.
Бұдан бөлек, мемлекеттік аппараттың жұмыс тиімділігінің негізгі көрсеткіші болып табылатын мемлекеттік қызмет көрсету саласыны аса көңіл бөлінді.
2017 жылдың 1-ші тоқсанында мемлекеттік органдармен 2 миллионға жуық қызмет көрсетілген. Бұл ретте электронды форматта көрсетілген қызметтердің үлесі өсуінің оң үрдісі байқалады. Осылайша, есепті кезеңнің ішінде ақпараттық жүйелер арқылы электронды нысанда көрсетілетін қызметтердің үлесі өткен жылғы осы кезеңмен салыстырғанда 33,5 % артқан (2017 жылғы 1 тоқсанда — 22,7%).
Бір уақытта дәстүрлі жолмен, яғни қағаз нысанда көрсетілген қызметтердің үлесі төмендеуде. Бұл көрсеткіш 56,7%төмендеген (2017 ж. 1 т.-62,5%, 2018 ж.1 т.-5,8%).
Осы кезеңде Департаментпен 13 тексеріс жүргізіліп, мемлекеттік көрсетілетін қызметтер туралы заңнама бұзушылықтың 470 фактісі анықталды. Департаменттің ұсыныстары негізінде 17 мемлекеттік қызметші тәртіптік жауапкершілікке тартылды.
Сондай-ақ, жаңа Әдеп кодексіне сәйкес мемлекеттік қызметшілердің мінез-құлық стандарттары турасында сөз қозғалып, М. Нәлібаев мемлекеттік қызметшілердің мемлекеттік қызметке кір келтіретін тәртіптік әрекетке бару мысалдарын келтірді. Есептік кезеңде Әдеп жөніндегі кеңестің 2 отырысы өткізіліп, 15 мәселе қаралды, оның 8-і тәртіптік істер.
Департаменттің сыбайлас жемқорлыққа қарсы жұмысымен таныстыра отырып, М. Нәлібаев сыбайлас жемқорлықтың алдын алуды күшейту «100 нақты қадам» Ұлт жоспарын жүзеге асырудағы маңызды қадам екендігін атап өтті. Департамент өзіне жүктелген бұл тапсырманы «Сыбайлас жемқорлыққа қарсы іс-қимыл туралы» заңына енгізілген нормалар негізінде алдын алу сипатындағы кешенді шараларды ұйымдастыру арқылы жүзеге асыруда. Ағымдағы жылдың бірінші тоқсанында аймақтың барлық жұмыс саласында сыбайлас жемқорлыққа қарсы мәдениетті қалыптастыру мақсатында 73 мыңға жуық адамды қамтыған 1219 іс-шара өткізілді.
Департамент сыбайлас жемқорлық тәуекелдеріне сыртқы талдау және сыбайлас жемқорлыққа қарсы мониторинг жұмыстарын жүргізіп отырады.
Осы кезеңде 5 мемлекеттік органдағы сыбайлас жемқорлық тәуекелдеріне сыртқы талдау жұмыстары жүргізілді.
Сыбайлас жемқорлық тәуекелдеріне жүргізілген сыртқы талдау қорытындылары бойынша 14 ұсыныс жасалып, талдау жасалған органдарға орындау үшін жолданды.
Сонымен қатар, Департамент ҚР ІІМ министрлігінің Қылмыстық-атқару жүйесі комитеті департаменті мен оның құрылымдық бөлімшелері қызметтеріне 1 сыбайлас жемқорлыққа қарсы мониторинг жүргізді.
Жүргізілген мониторинг қорытындылары бойынша Қылмыстық-атқару жүйесі Департаментіне сыбайлас жемқорлық тәуекелдерін жою және оларға жол бермеу мақсатында тиісті ұсыныстар жолданды.
Брифинг барысында БАҚ өкілдерінің сұрақтарына нақты жауаптар беріліп, жекелеген мәселелер бақылауға алынды.